Eindige versameling

'n Eindige versameling is 'n versameling in wiskunde wat 'n eindige aantal elemente besit. Die versameling

${\displaystyle \{2,4,6,8,10\}\,\!}$

is byvoorbeeld 'n eindige versameling met vyf elemente. Die aantal elemente van 'n eindige versameling is 'n natuurlike getal, oftewel 'n nie-negatiewe heelgetal, en word die kardinaliteit van die versameling genoem. 'n Versameling wat nie eindig is nie, is oneindig. Die versameling positiewe heelgetalle is byvoorbeeld oneindig:

${\displaystyle \{1,2,3,\ldots \}.}$

Eindige versamelings is veral belangrik in kombinatoriek, die wiskundige studie van tel. Menige argumente met eindige versamelings maak staat op die duifhokbeginsel wat bepaal dat daar geen injektiewe (een-eenduidig of een-op-een-) funksie bestaan wat 'n groter versameling aan 'n kleiner versameling koppel nie.